مختصرمختصرافسانہ
میں، ڈائری اورمیرا قلم
غزالہ پرویز. کراچی ، پاکستان
0336-2451325
مجھے کچھ دنوں سے اپنے کمرے میں سسکیوں کی آواز سنائ دینے لگی تھی ، کبھی کبھی، دبی دبی سی، چند لمحے اور پھر سناٹا۔۔۔۔۔
گھر کے ہر شخص سے میں نے استفسار کیا ، لیکن نہیں وہ سِسکیاں شاید صرف میرے سماعت کے دائرے میں تھیں، سوتے میں کبھی آنکھ کھلتی جب بھی سسِکیاں، صبح سے شام تک کمرے کے پاس سے گزرتی تو سسکیاں ۔۔۔۔شام میں لپ ٹاپ پہ خیالات کے تانے بانے میں اُلجھی سوچوں کے بھنور سے الفاظ کے موتی چُن چُن کر ٹائپنگ کر رہی ہوتی تو ٹَک ٹَک ٹَک کے ساتھ ” آہ ” کی آواز ۔۔۔۔۔۔۔۔۔
جب سے لیپ ٹاپ لیا تھا تحریروں کو زیادہ وقت دینے لگی تھی،بس موقع ہاتھ لگتا تو ٹپاٹپ ٹائپنگ۔۔ کچھ زیادہ ہی آرام پسند بھی ہوگئ تھی ،میز پہ جانے کی ضرورت بھی نہیں ۔۔ بس ۔۔ نرم گرم آرام دہ بستر ہوتا ،میں میرا لیپ ٹاپ اور میری تحریریں ۔
۔۔۔۔۔۔۔ کل بھی رات کے پچھلے پہر کچھ لکھ رہی تھی کہ سِسسِس کی آواز۔۔۔ میں رُک گئ ۔۔۔۔۔۔۔۔۔۔۔ آج تو معلوم کر ہی لینا ہے کہ یہ وہم ہے یا کچھ اور ۔۔۔۔۔۔۔۔۔۔۔۔کچھ لمحے چپ چاپ خاموشی کی نذر کیۓ جہاں صرف گھڑی کی ٹِک ٹِک اور دِل کی دھک دھک کا شور تھا اور، اور اُس شور میں شاید سسکیاں دب سی گئ تھیں ۔۔۔۔
کہاں سے آتی ہے یہ آواز اگرچہ اسی کمرے میں سے ہے ۔۔۔ میں انتظار سے تھک کر دوبارہ خیالات کے دھاگے سلجھانے لگی اور لیپ ٹاپ کی ٹَک ٹَک ۔۔۔ اور۔۔ سسکیاں۔۔۔ میں بستر سے اٹھ کھڑی ہوئ، آواز کا رُخ کمرے کے کونے سے تھا جہاں میری میز تھی۔۔۔ ۔۔۔۔۔۔۔۔۔ آواز کے رُخ کا تعین کرکے میں وہاں پہنچی ، اگرچہ کہ آواز اب رُک گئ تھی، شیلف پہ کتابیں اِدھر اُدھر کھسکائیں ، کپ، ٹشو پیپر کا باکس، شیشے کے ڈیکوریشن پیسز ،میز کے نیچے، پیچھے، میز کی درازیں، کیسٹیں ہلاجُلا کے، ہت تیرے کی میں نے اپنے سَر پہ چپت رسید کی ، میرا وہم، بس میرا وہم۔۔۔۔۔
کچھ سوچا پھر لیپ ٹاپ میز پہ رکھ کر کرسی پہ براجمان اور ٹَک ٹَک۔۔۔۔ سِسسِس ایک سِسکی اور ٹَپ پانی کا قطرہ میرے ہاتھ کے پشت پہ ۔۔
میں نے نظر اوپر شیلف پہ ڈالی ، اور کھڑی ہوگئ ۔۔۔۔۔۔۔۔۔۔۔۔۔۔ سکتے کے چند لمحے ، میرے قلمدان میں رکھے قلم کےنوک پہ ایک ننھا سا لرزتا قطرہ جھلملا رہا تھا۔۔۔۔۔چند صدیوں پہ محیط وہ لمحہ ۔۔۔۔اور۔۔۔۔۔ آہ کی آواز کے ساتھ ٹَپ ۔۔۔۔۔ قطرہ مچلتا ہوا گرا، برابر رکھی مدّتوں سے بند ڈائری پر۔۔۔۔ سسِسسِسس ایک سسکاری اُبھری۔۔۔۔۔۔۔۔
