ابن صفی:۸۷ واں یوم پیدائش اور۳۵ ویں برسی کے موقع پر۔از۔ دلجیت قاضی

ابن صفی اورآدمیت کی معراج
ابن صفی : ۸۷ ویں پیدائشی اور ۳۵ ویں برسی کے موقع پر

مرسلہ: دلجیت قاضی
حیدرآباد ۔ دکن

اصل نام : اسرار احمد
شہرت : ابن صفی
وطن : نارہ ۔ الہ آباد ۔اترپردیش ۔انڈیا
پیدائش : 26 جولائی 1928
انتقال : 26 جولائی 1980
پیشہ : ناول نگاری
موضوع : جاسوسی
ناول سیریز : جاسوسی دنیا اور عمران سیریز

ابن صفی کے ناول ’’ پیاسا سمندر‘‘ سے ایک اقتباس

“آدمی کتنا پیاسا ہے ، اور کس طرح اسکی پیاس بڑھتی رہتی ہے ، اور کس طرح وہ خوارج میں اپنے لئے تسکین اور آسودگی تلاش کرتا ہے ، مگر کیا کبھی بھی اسے تسکین نصیب ھوتی ہے ؟ کبھی آسودگی ملتی ہے ؟ ، مگر وہ بالکل کسی سمندر ہی کی موج در موج آگے بڑھتا چلا جاتا ھے ، کبھی چٹانوں کو کاٹتا ہے ، کبھی پہاڑوں میں رخنے کر کے ان کے پرخچے اڑا دیتا ھے ، اپنی بے چینی کی وجہ وہ خود ہے ، اور اپنی تسکین کا سامان بھی اپنے دامن میں رکھتا ہے ، مگر وہ دوسروں کی پیاس تو بجھا دیتا ھے ، خود اپنی پیاس بجھانے کا سلیقہ نہیں رکھتا ۔ ۔۔ ۔ تم اسے پیاسا سمندر کہہ سکتی ہو بے بی ۔ ۔ ۔ ۔ جو پانی ہی پانی رکھنے کے باوجود بھی ازل سے پیاسا ہے ۔ ۔۔ ۔ اور اس وقت تک پیاسا رھے گا جب تک کہ اسے اپنا عرفان نہ ہو جائے ، لیکن اس میں ہزارہاں سال لگیں گے ۔ ۔ ۔۔ ابھی تو بچوں کی طرح گھٹنوں چل رھا ہے ۔ ۔ ۔ ۔ ابھی تو چاند میں جانے کی باتیں کر رہا ہے ، اسکی ذہنیت اور سوجھ بوجھ اس بچے سے زیادہ نہیں ہے جو ماں کی گود میں چاند کے لئے ہمکتا ہے ۔ ۔ ۔ ۔
وہ مصنوعی سیارے اڑا کر اس طرح خوش ہوتا ہے جیسے بچے صابون کے بلبلے اڑا کر مسرور ہوتے ہیں ۔ ۔ ۔ اور ایک دوسرے سے شرط بدلتے ھیں کہ دیکھیں کس کا بُلبلا دیر تک فنا نہیں ہوتا ، اور پھر ایسے شیخیاں بگھارتے ھیں جیسے انہوں نے کوئی بہت بڑا کارنامہ انجام دیا ہو ، مگر بے بی ۔ ۔۔ ۔ چاند کا سفر آدمیت کی معراج نہیں ہے ۔ ۔ ۔ ۔ چاند کی باتیں تو ایسی ہی ہیں جیسے کوئی اپنے اصل کام سے اکتا جائے اور بیٹھ کر گنگنانا شروع کردے ۔ ۔ ۔۔
جانتی ہو آدمیت کی معراج کیا ہے ؟ ۔ ۔۔ ۔ آدمی کی معراج یہ ھے کہ آدمی خود اپنے ہی مسائل حل کر لے ۔ ۔ ۔ ۔ اگر اس نے مصنوعی سیارہ فضا میں پھینکنے کے بجائے سرطان کا کامیاب علاج دریافت کیا ہوتا تو میں سمجھتا کہ اب اسکے قدم اس راہ کی طرف اٹھ گئے ہیں جس کی انتہا اسکی معراج ہو گی ، اگر اس نے چاند تک پہنچنے کی اسکیم بنانے کی بجائے زمین کے ہنگامے کا پرامن طور پر فرو کرنے کا کوئی ذریعہ دریافت کر لیا ہوتا تو میں سمجھتا کہ اب یہ پیاسا نہیں رہے گا ، بلکھ خود کو بھی سیراب کرنے کی صلاحیت اس میں پیدا ہو چکی ہے ۔ ۔ ۔ ۔ ہزارہا سال چاہیں اس کے لئے شمی ہزار سال “
اور پھر اسی کا جواب بھی ابن صفی عمران کے منہ سے کہلواتے ہیں
“ویسے یہ بات اچھی طرح سمجھ لو کہ آدمیت کی معراج صرف حماقت ہے ۔ ۔ ۔ میں یہ بھی تسلیم کر سکتا ہوں کہ آدمی کو ابھی اپنا عرفان نہیں ہوا ، جس دن بھی ہوا وہ احمق ہو جائے گا ، اور یہی اسکی معراج کہلائے گی ۔ ۔ ۔ آدمی ازل سے ہی احمق رہا ہے ، اور وہ ابد تک انشااللہ احمق ہی رہے گا ، ویسے یہ اور بات ہے کھ اسے اپنا عرفان نہ ہو سکے ، احساس نہ ہو سکے کھ وہ احمق ہے ، اسلئے اچھی لڑکی زیادہ سے زیادہ احمق بننے کی کوشش کرو چاند خود ہی بوکھلا کر تمہاری چھت پر اتر آئے گا ۔
تمہیں وہ کہانی تو یاد ہی ہو گی کہ ایک بار ہمارے آباؤ اجداد تالاب میں چاند کا عکس دیکھ کر اس تک پہنچنے کے لئے ایک دوسرے کی دم پکڑ کر کسی درخت کے نیچے لٹکتے چلے گئے تھے اور کس طرح یک بیک اوپر والے بزرگ کے ہاتھوں سے درخت کی شاخ چھوٹ گئی تھی اور وہ سارے برگزیدہ حضرات ایک دوسرے کی دم پکڑے چاند تک پہنچنے میں کامیاب ہو گئے تھے ، وہیں سے آدمیت کی معراج شروع ہوئی تھی ۔ ۔ ۔“ ماخوذ